BOLUETAKO PONPAKETA ETA TURBINAKETA INSTALAZIOA

Proiektuaren xedea da Partzuergoko Hornidura Sarea ponpaketa-estazio batez hornitzea, Nerbioi ibaiaren baliabideak lehorte aldietan edo Zadorra sistemaren hornidura aski ez denean aprobetxatzeko. Emari hauek Nerbioi ibaitik, Boluetan barna, Beteluriko Edateko Uren Araztegira ponpatuko dira, eta han araztu eta banatuko dira.

Boluetako ponpaketaren eta Beteluriren arteko bulkada, neurri handi batean, lehendik dagoen hodi baten bidez egiten da, eta 200 metro inguruko tartea egin behar da ponpaketa-estazioa hodiaren muturrarekin lotzeko. Gainera, 120 metroko luzera duen pantaila-horma bat egitea aurreikusi da, metro bateko zabalerarekin eta 18,50 metroko sakonerarekin.

Bestalde, ponpaketa kokatuko den instalazioetan bertan zentral hidroelektriko bat jartzea aurreikusten da, Undurragako urtegiko (Zeanuri) Zadorra sistemaren soberakinak aprobetxatu ahal izateko, eta Kantauriko Konfederazio Hidrografikoak euri-soberako aldietan emandako 2000 litro/segundoko emakida.

Horretarako, ponpaketa-instalazioen zati bat erabiliko da (hoditeria itzulgarria izango da), eta Boluetatik Betelurira bulkada gisa jokatuko da Zadorra sistemaren hornidura nahikoa ez denean, edo energia elektrikoa sortzeko jauzi hidrauliko gisa, Zadorra sistemaren soberakina Beteluritik Boluetara eramaten denean.

Turbina-alternadore multzo bat instalatuz, Beteluriko EUA-ren kotaren (+173 metro) eta Boluetako zentral hidroelektrikoaren kotaren (+14,50 metro) arteko jauzia aprobetxatzen da energia elektrikoa modu berriztagarrian sortzeko, eta, ahal den neurrian, hidrokarburoen kontsumoa eta, oro har, erregaiekiko mendekotasuna murrizten dira. Ponpatzeko ahalmena 2,00 m3/s-koa da 160 m-ko altueran, eta turbinatze-emaria 4,5 m3/s-koa da.